Onnia annu si rennòbant is affestus a onori de santa Maria Assunta, amparadora de sa bidda. Custa recurrenzia esprèssat po is bividoris de Domusnoas “
sa festa manna”, a sa cali est alliongiada sa festa populari connota cun su nomini de “su carru de sa linna”. Una cida intera intre zirimonias religiosas, musica, teatru, mostas, candu totu sa bidda esprèssat sa divozioni sua a sa Madonna in su respettu de su connotu.
Sa dì totu intregada a sa santa est su 15 de austu, cun is missas e sa prucessioni solenni in pari cun
is traccas e sa banda musicali. Oindì puru is messaius àndant in is padentis a segai linna po cuncordai “su carru de sa linna”. Pìgant parti a sa prucessioni is trattoris cuncordaus chi oindì ant remprasau is carrus antigus tragaus de is bois, ma su prexu e sa partecipazioni funt abarraus is propius de su tempus passau.
Su carru carattiristicu postu in mesu de sa bidda est oindì puru unu premiu appetessiu. Adrianu Vargiu in “Ferragosto in Sardegna” sprànat cumenti su significu de custu connotu siat inserrau in su votu chi in s’antigoriu
is bagadius fadìant in su tempus de is festas popularis: straportànt cun is carrus sa linna chi fiat utilisada po ndi pesai, accanta de sa cresia, unu aprigu aundi s’amparai de su soli e de s’aqua.
Est una festa populari antiga meda, una de is pagus chi tengat ancora prus de unu de is carattiris suus de is primizius, chi pòrtant a 150 annus fait, candu is messaius, po segai sa linna, partiant a de notti cun is carrus insorus tragaus de is bois po is grandu padentis chi fiant a furriu de sa bidda.
