Is saboris tipicus de Domusnoas funt cussus de sa terra alliongiaus a su mundu massarxesu. Is gustus funt simplici e is aromatus ndi benint de is matas chi crescint in su sartu nostu, e arregòrdant sa murta, su lau e su zipiri. Su pani in particulari esprèssat unu alimentu tipicu de su connotu nostu. Giai in su tempus de sa dominadura romana sa Sardigna fiat nomenada “s’orriu de Roma”.

	Su pani de trigu

Mancai de unus ottant’annus in sa bidda nci fessit assumancu unu panetteri, casi totu is feminas fadìant su pani in domu po totu sa familia: su pani de trigu, su pani cun gerda, su pani de saba. Unus cantu fiant povinas bellus a ddus biri, cumenti is coccoieddus pintaus chi s’apparicciànt po is festas mannas. Ancora oi est possibili agatai in calincuna familia su pani de trigu, traballau cumente unu tempus e fattu coi in su forru a linna. Calidadis differentis funt puru is ispezias de pasta: sa fregula, is malloreddus, cundius cun bagna de pezza de porcu o de angioni, cun allu, ollu e casu de brebei pizzianti; is curruxonis, is zapueddus, arrogheddus de pasta cundius cun bagna e apparicciau cun sartizzu.

Porceddu arrustu

Su prattu de prus importu est sa pezza arrustia de porceddu o de angioni, infrissia in is ischidonis de linna. Po ddi donai unu aromatu incunfundibili, a s’acabu de sa cottura sa pezza si sègat a arrogheddeddus e si ponit a pizzus de unu talleri de ortigu coberta de murta.
In is rizettas de su connotu de Domusnoas ddoi est puru su cordolinu (corrorinu). Is padentis suus e is sartus, perefettu, offerrint de custas gutturrenzias in grandu cantidadi chi giai in su tempus de is Romanus fiant in cunsuderu de mandiari dignu de is imperadoris. Su cordolinu si podit apparicciai in maneras differentis: cunfrittu cun ollu de olia, allu, perdusemini ammacuau, sali e pibiri; cun sa pasta sighendi sa manera de innantis; arrustiu in su fogu cun ollu i allu; frittu a pustis de dd’ai passau in su pani trattau; oppuru cun axedu.