A testimongiai sa cultura antiga massarxesa funt abarradas pariccias domus: unas cantu allogadas bèni, atras a dolu mannu in d’una cundizioni de sbendonu. Totus stroccint s’architettura tipica de is domus campidanesas, domus massarxesas presentis cun d’unu numeru mannu in Campidanu.
Passillendi in su centru storicu, su turistu tenit sa possibilidadi de mirai custus fabbricus de interessu mannu.
In custa tipologia ddoi ìntrat cussa chi fiat sa Domu de is Loccas, a su numeru duus de s’Arruga XXV Abrili. Sa domu, in d’unu stadu malu de allogu, fiat sena de duda de una familia benistanti cumenti ammòstat s’ampraria de su fabbricu e sa presenzia de duas intradas: una prinzipali e un’atra segundaria chi portàt aintru de sa domu de su serbidori. Sa domu est stetia fabbricada, si pènzat, a s’acabu de su 1800, a mattonis de ludu e palla, su ladiri, chi, a pustis impastaus cun s’aqua, ddus fadìant siccai a su soli. Is murus a ladiri funt asuba de fundamentus grussus a pedra logali (su schistu). Sa cobertura a un’aqua est imbussada a teula corcovada fatta a manu cun terra de strexu. S’affacciada ammòstat unu portali ampru cun d’unu arcu a totu sestu, incornissau e poderau de ladiris.
Unu portali fait intrai a sa prazza de ananti aundi s’agàtant, a manu deretta, sa domu, e a facci, a manu manca, una lolla ampra, unu fueddu chi ndi benit de sa “loggia” tuscana. Custa tenit colondreddas cun mattoni a bista, chi podèrant una teulada cun teula posta a pizzus de una cobertura de canna.
Sa domu de is Loccas ammòstat infinis una carattiristica fittiana in is domus de sartu: su solariu chi fadìat a arrebustu po allogai su trigu e is leguminis. S’aria e sa luxi ìntrant in custu aposentu asutta de sa cobertura peri una ventanedda.
A is numerus 37 e 38 de s’Arruga Buozzi ddoit est sa Domu de is Mancosus, unu fabbricu a duus pianus bastanti mannu e cunfortosu.

Domu de is Mancosus

Fabbricada probabilimenti facci a sa mitadi de su 1800, tenit is fundamentus de pedra (schistu), chi podèrant una muradura de ladiri. S’affacciada s’ammòstat liniari e lisa, cun d’unu portali cun arcu a totu sestu, poderau de duas colondras grussas a mattoni cun d’unu cabidellu postu de longu a pizzus. S’arcu est serrau de su portali de linna de primizius. In su primu pianu quattru ventanas, duas prus ampras, s’incàrant a pizzus de unu curridoriu cun is cobertureddas chi essint a foras poderadas de una barandillia de ghisa. A su numeru 35 de s’Arruga Amsicora est sa Domu de is Valdes. Su fabbricu, in arrecasciu, est a duus pianus, cun d’unu portali de intrada ampru cun d’unu arcu a totu sestu. Intremesu de sa gecca de ferru, si podit appubai unu aposentu de intrada cun d’una cobertura fatta cun bigas de linna; issu, andendi ananti, pòrtat a unu giardinu lattiosu. S’affacciada s’ammòstat lisa e liniari cun ventanas strintixeddas chi allògant serramentas de linna de una borta in stili mesuterraniu.