Su molinu de sa “Ferreria”

Intre is fabbricus antigus, Domusnoas allògat, in s’Arruga de sa Stazioni, propiu a manu manca, su mulinu becciu de “sa Ferreria”. Fabbricau in sa segunda mitadi de s’800, est s’unicu intre is medas molinus presentis in s’antigoriu in sa bidda chi no est stetiu sderroccau in totu e ammòstat is sinnus de su tempus, ma de pagu s’amministrazioni comunali at provvediu a su recuberu suu, sarvendi su monumentu de una ruina totali. Est unu fabbricu mannu de pedra a pranta rettangulari cun sa cobertura imbussada a teula sarda.

S’affacciada ammòstat un’obertura lada cun d’unu arcu a mattoni chi est s’intrada prinzipali, e a manu manca una ventanedda. In su ladu de manu deretta chi s’incàrat in s’arruga si bit bèni unu muru cun quattru oberturas, cussas de pizzus cun d’unu arcu a mattoni. Custa est de seguru su chi abàrrat de unu fabbricu chi no at poderau a su tempus e chi una borta fiat sa parti de prus importu de su fabbricu interu. Su molinu funzionàt grazias a sa forza de s’aqua, perefettu, est stetiu fabbricau, cumente totu is atrus molinus chi fiant in Domusnoas, óru-óru de unu canali artifiziali, aundi fiat fatta andai s’aqua chi fadìat movi un’arroda manna de linna chi portàt colligada una pedra manna circulari chi, fadendi su furria-furria, moliat su trigu. In custu molinu ddoi fiat puru sa prenza po moliri s’olia.