Una bisita a su centru storicu ammòstat s’esistenzia de medas portalis beccius, no totus a dolu mannu in d’unu stadu bonu. Issus s’incàrant cun d’una calincuna magnosidadi in is arrugas, i esprèssant a bortas s’unicu arrastu abarrau de cuddas domus massarxesas antigas chi su tempus nd’at sderroccau, o chi s’omini nd’at sciusciau po lassai su logu a domus modernas. Su prus antigu intre cussus chi si funt mantenius finas a oi est su Portali de is Poddas, in s’Arruga Roma n. 89, e arrecasciau de pagu tempus. Issu, chi tòrrat a coa a sa simana pisana, est fabbricau a pedra ammesturada (schistu e granitu) e mattonis a pasta groga fattus a manu e muraus cun ludu. S’arcu de forma irregulari est de mattoni probabilimenti de sa simana romana. Pòrtat a pizzus una coberturedda de canna, imbussada a teula corcovada (i coppi), e serrau de una gecca de ferru chi at remprasau cussa antiga de linna. Unu particulari curiosu meda est rappresentau de una ventanedda, in su ladu de manu manca de su muru, serrada cun d’una arrecciada de ferru. Custu portali probabilimenti donàt s’intrada a sa “cracchera de is paras de santu Franciscu”, est a narri su logu aundi custus paras ammoddiànt is pannus chi issus etotu produsiant po fai s’abidu insoru. Po custu, issus, chi in su 1660 iant fabbricau propiu in custa cussorxa su gunventu insoru, imperànt sa lana de brebei, chi fiat filada cun su fusu e a pustis tessia a manu in su trobaxu. Si ndi bogàt aici su pannu chi si naràt orbaxi. Po ddu fai prus moddi acciuvànt su tessiu in s’arriu e ddu pistànt cun is peis; propiu de su fueddu sardu “craccai”, chi bolit narri propiu pistai, at pigau nomini totu sa cussorxa chi si zérriat “Cracchera”.