Nant ca is turistus appròviant a is costas sardas, de aundi pagu bortas si ndi stésiant, accuntentendisì de si gosai su mari e is plaias meda bellas. Nos ddus cumbidaus invecias a bisitai sa bidda nosta, posta in d’una cussorxa de aintru, prus pagu trastiggiada ma aterettantu eccisera.
Po ddoi lompi tòccat a fai sa bia statali 130, chi collìgat sa cussorxa Sud-occidentali de sa Sardigna cun Casteddu, a pustis, prus o mancu a 40 chilometrus de su capulogu, si pìgat sa stressiada po Domusnoas.
In is logus nostus sa natura e sa storia a bortas s’ammestùrant a pari, po cussu in custa ghia turistica presentaus camminus storicus a sa rescoberta de su passau e de su connotu, ma camminus puru naturalisticus po chini stìmat is padentis e sa bentura.
Su rialisai custu traballu est stetiu comente fai unu biaxi po is arrugas e is prazzas de sa bidda intendendisì nos puru “turistus in su logu innui biveus”, poita ca, torrendi a passai in is furrungonis carattiristicus arriccus de storia, eus scobertu de sa bidda nosta caras chi si fiant disconnotas finas a immoi. Seus intraus a pustis in is mòris de is montis chi insèrrant Domusnoas, appubendi po sa primu borta paisaggius nous, innui sa natura esprèssat totu su spantu suu.
Boleus regalai a chini no connoscit Domusnoas un’occasioni de cummovidura, ma pruschetotu disigiaus, cun custu traballu, de ndi pesai s’interessu de medas po custa bidda pitica ma ingreghiadora.
Si auguraus chi s’interessu siat aici forti de ndi ddus tirai finas a innoi.